الاحترام:
الاحترام مش مجرد كلمة بنقولها،
ولا تصرف بنعمله لما الناس تشوفنا
الاحترام هو أسلوب حياة لا ده حياة كامله
بيبان في الكلام، وفي النظرة، وفي الفعل.
الاحترام مش معناه الخوف،
الاحترام هو إنك تدي كل إنسان قيمته،
من غير ما تهينه، ومن غير ما تقلل منه
اللي عنده احترام، عنده أخلاق،
لأنه بيحترم غيره زي ما بيحب الناس تحترمه.
تلاقيه ما يرفعش صوته،
ما يقطعش كلام حد،
يسمع قبل ما يتكلم،
ويفكّر قبل ما يرد حتى لو مختلف عنك في الفكر أو الدين أو الشكل أو الطريقة.
الاحترام مش بنتعلّموا في يوم وليلة،
ده بنتربة عليه من واحنا عيال
من البيت من الأب والأم فيه بيحترموا بعض،
ومن الكلمة الحلوة اللي الطفل بيسمعها،
ومن القدوة اللي بيشوفها كل يوم.
الاحترام بيبدأ من نفسك،
لما تحترم ذاتك،
مش هتسمح لحد يقلل منك،
ومش هتقلل من غيرك كمان.
والاحترام مش بس مع الناس اللي بنحبهم لا
الاحترام الحقيقي بيبان لما تختلف
لما تعرف تقول رأيك من غير ما تجرح حد ،
وتسمع رأي غيرك للأخر حتى لو مش عاجبك.الاحترام مش بس في البيت الاحترام بينك وبين اخواتك اصحابك شغلك احنا
في زمن بقى فيه قلة الأدب اسمها "جرأة"،
والسخرية بقت "دم خفيف"،
اللي لسه متمسك بالاحترام يعتبر جوهرة نادرة.
لأن الاحترام مش ضعف،
الاحترام قُوة… قوة تملك نفسك وقت الغضب،
وقوة تحافظ على كرامة الناس حتى لو زعلوك اللي بيحترم نفسه، بيختار كلامه،قبل ميقوله
وبيحافظ على صورته قدام الناس،
وبيتعامل بذوق حتى مع اللي أذاه،
مش ضعف…
لكن لأنه عارف إن الاحترام مش رد فعل،
ده مبدأ. وفيه احترام للطبيعة، للحيوان، للكبير، للي الاهل الام الاب الاخ الصديق
حتى للأماكن اللي بتدخلها.
الاحترام مش مجرد تصرف،
هو انعكاس لتربية حقيقية وقلب صافي زمان قالوا زمان
"من احترم الناس، احترموه."
وده حقيقي جدًا،
اللي يزرع احترام، بيحصد تقدير وكرامة.
في ناس تفتكر الاحترام ضعف،
لكن الحقيقة العكس تمامًا،
اللي يعرف يحترم وهو مدايق أو متعصب،
ده إنسان قوي جدًا،
قادر يتحكم في نفسه وفي مشاعره.
الاحترام مش بيُطلب هو بيحس وبيتشاف من المعاملة مش في ناس تقول اي التربية الجميلة دى ده ابن ناس ومحترم هنا الاحترام للي نفسك وللي اهلك
مش بتقول "احترموني" بالعافية
لكن بتخلي الناس تحترمك من غير ما تطلب،
بسلوكك، وطريقتك، وكلامك.
وفي النهاية...
، الاحترام هو اساس كل علاقه ناجحه هو الجسر اللي بيخلي القلوب تتقابل،
من غير خوف ولا كبرياء. اللي بيخلّي الدنيا تمشي بسلام،
لأنه لو الناس احترمت بعض،
مكنش هيبقى في كره ولا ظلم ولا كذب،ولا نفاق ولا خيانة
لأن الاحترام بيجمع كل القيم اللي اتكلمنا عنها قبل كده.
احترم نفسك هتحترم واحترم غيرك هتحترم
وصدقني…
اللي يعيش بالاحترام، يعيش مرفوع الراس دايمًا.