Wo din normal hi tha. Ek chhoti si baat thi mujhe apni ek dost ki birthday party me jaana tha. Maine permission maangi.
Expected jawab aaya "Nahi."
Par is baar pata nahi kahan se himmat aayi. Maine dheere se kaha, "Main jaana chahti hoon."
Ghar me ekdum se silence ho gaya. Bhai ne kaha, "Zyada zubaan chalne lagi hai." Mummy ne bas dekha. Papa ne strict tone me bola, "Humne mana kiya na."
Mera dil zor zor se dhadak raha tha… par is baar maine chup rehne ke bajaye kaha, "Har baar main hi adjust kyun karun?"
Ye shayad meri life ka pehla sawaal tha jo maine unse poocha.
Us raat bahut arguments hue. Main royi bhi. Par pehli baar mujhe laga maine apne liye khud stand liya.
Shayad main abhi bhi ghar ki sabse choti hoon. Shayad abhi bhi sab kuch overnight change nahi hoga.
Par ek cheez zaroor badal gayi hai…
Is baar maine khud ko ignore nahi kiya.
Aur shayad… ye meri nayi kahani ki shuruaat hai.