Sadak par dhool ud rahi thi aur door door tak koi nahi tha.
Sookhi sadak par udti dhool ne dhoop ki roshni ko bhi dhundhla kar diya tha, jaise poore shahar par kisine mitti ki chadar dal di ho
Wo barik dhool garm hawaaon ke saath milkar kisi bhoot ki tarah nachti hui dikhai deti thi.
Nidhi usi dopahar mein dukaan se kuchh saman kharidne ja rahi thi.
Uske pichhe-pichhe do log aur ja rahe the.
Ek ka naam tha "Rishi" jo hai to isi gaaon(Ranipur) ka lekin hamesha shahar(Prayagraj) me rahta tha.
Rishi jitna handsome pure gaaon mein koi nahi tha. Wo apne papa aur chacha ke siwa kisise se nahi darta tha. Wo irade ka majboot aur wade ka pakka tha.
Dusre ka nam tha "Manu" jo hamesha se gaaon mein hi rahta tha. Badi si
naak,chhota kad,aur padhne likhne mein ekdam zero tha. lekin apne aapko bahut hoshiyaar samajhta tha.
Achanak manu ki nazar ek diwaar par padi. Usne dekha ki us diwaar par int ke patthar se kuchh likha tha. Lekin wo padh nahi paya.
Manu:- bhai dekh na is diwaar par kya likha hai?
Rishi:- kaha yaar?
Manu:- Ye dekh.
Rishi:- yaar tujhe itna sa padhne nahi aata.
Manu:- nahi aata tabhi to puchh raha hun, agar mujhe padhna hi aata to tujhse main kyun puchhta?
Rishi:- "I love you" likha hai pagal.
Manu uncha sunta tha isliye wo thik se sun nahi paya.
Usne phir se puchha bhai teji se bol na.
Rishi:- is baar Rishi teji se bolta hai- " are I love you " likha hai.
Itna sunte hi nidhi jaise hi palatkar dekhti hai. Uski nigahein Rishi ki nigahon se takra jati hai.
Nidhi Rishi ko gusse se ghurti hai.
Aur Rishi use bina palak jhapkaye ek nazar se dekhta hi rah gaya.
Kyonki jabse wo is gaaon mein aaya hai usne itni khubsurat ladki pure gaaon mein kahin nahi dekhi.
Nidhi ne apne aas paas dekha aur koi nahi tha, use laga ki wo I love you padhkar suna nahi raha hai, balki akeli ladki jankar chhed raha hai ye shahar ka bigdail ladka.
Nidhi Rishi ko ghurkar to chali gayi lekin uske dil ka chain apne saath le gayi.
Rishi:- yaar Manu abhi-abhi jo ladki mujhe gusse me ghurke gayi wo kaun thi?
Manu:- Are yaar wo bhi apne hi gaaon ki hai bas kuchh hi din pahle mumbai se gaaon mein aayi hai.
Suna hai ye ladki padhne likhne mein bahut tez hai aur gana bahut achha gati hai. Iska mukabla pure gaaon ki ladkiya milkar nahi kar sakti.
Rishi:- achha itni talented hai ye ladki.
Rishi aur Manu dono aapas mein baatein karte-karte apne-apne ghar pahunch jate hain.
Rishi ki nazrein nidhi ki aankhon se takrakar wapas to aayi,lekin khali haath nahi.... balki apne saath ek meethi si bechaini le aayi.
Wo aankhein band karta to nidhi ka chehra samne aata aur kholta to har jagah wahi nazar aati thi.
Baat bhale hi kisise kar raha ho par dhyaan us pal usi par atka rahta tha.
Wo nidhi ko dekhne ke liye har roz uske ghar ke samne 100 chakkar lagata tha.
Uska din na suraj ke nikalne se shuru hota tha,na dhalne se khatam.
Uska din to bas ek jhalak se shuru hota tha jo use nidhi ke ghar ke samne se guzarne se milta tha.
Wo ek pagalpan tha ek nasha tha, wo janta tha ki use kucch haasil nahi hoga,par har roz wahi rasta, wahi intezaar, wahi pichha karna uski zindagi ka ekmatr maksad ban gaya tha.
Uski aankhein bhid mein bhi sirf nidhi ki talaash mein hi rahti thi, jaise hi nidhi uske aankhon ke samne aa jati thi uski aankhon ki bechaini sukoon mein badal jati thi.
Jab jab nidhi apne khidki pass baithti.
Tab tab Rishi khidki ke samne wale mandir par baithkar uska didaar karta.
Wo jaha bhi jati Rishi saye ki tarah uske pichhe-pichhe jata.
Class mein bhi use dekhne ke liye pahli wali sit par corner mein baithta tha,taki use jee bharke dekh sake.
Wo nidhi ko har gali har mod pe mil jata tha. Bahut pyaar karta tha wo nidhi se.
Nidhi ki taraf koi aankh uthakar dekh le ye bhi manjzur nahi tha usko.
Sari ladkiyaan uske pichhe pagal thi lekin use nidhi ke siwa koi nahi bhata tha.
Uska gusse se ghurna, Rishi ke dil ka sukoon ban chuka tha.
Wo to itna pagal ho gaya tha nidhi ke pyaar mein ki akele mein bhi uski yaadon mein khoya rahta tha.
Mitti par apne haathon se uska aur apna naam ek saath likhkar use itni khushi hoti thi mano wo uske saath baithkar usse baatein kar raha ho.
Bechara mohabbat to beimtehaan karta tha lekin izhaar karna nahi aata tha.
Wo jitni baar izhaar karne ki sochta nidhi ke samne pahunchte hi sabkuchh bhool jata.
Wo har roz bhagwan se uski salamti aur khushi ki duaa karta aur bade hi masumiyat se bhagwaan se kahta- " he bhagwaan! Use kisi aur ki mat hone dena,use hamesha khush rakhna aur uske dil mein bhi mere liye thodi si jagah bana dijiyega, taki wo mujhe ghurkar nahi,balki pyaar se dekhe.
Mujhe dekhkar wo ignore na kare, balki wo bhi mere didaar ke liye besabri se intezaar kare".
Lekin achanak ek din sabkuchh badal gaya.
Jo kabhi nidhi ke galiyon ke 100 chakkar lagata tha usne nidhi ke galiyon mein aana hi chhod diya.
Jo nidhi ke bas ek jhalak ke liye mandir par baithkar khidki ke khulne ka intezaar karta tha. Usne mandir par baithna hi chhod diya.
Jiski nigahein bhid mein bhi nidhi ko talashti thi.
Wo nigahein samne se dekhkar bhi use nazar andaaz karne lagi.
☆Aakhir kya wajah thi Rishi ke badalne ki?
☆Kya Nidhi bhi usse pyaar karti thi ya ye ek tarfa pyaar tha?
☆ Kya Rishi ke badal jane se ye love story yahin par khatam ho jayegi?
Ya phir yahin se hogi pyaar ki nayi shuruaat?