Vishwas Ka Karz" chapter -1
Shehar ke ek kone me ek choti si chai ki tapri thi…
Us tapri ka malik tha Raghav.
Raghav ke teen bachche the — Aarav, Choti Meera aur sabse chota Kabir.
Uski patni Suman ghar sambhalti thi. Gareebi thi… lekin sukoon tha.
Din bhar Raghav chai banata, shaam ko bachchon ke liye mithai ka chota sa tukda le aata. Zindagi mushkil thi… par imaandaar thi.
Ek din achanak uska chhota bhai Vikram shehar aaya.
"Bhai…" Vikram ne dheere se kaha,
"mujhe thode paise chahiye… bas kuch mahine ke liye. Byaj pe dilwa de. Main byaj bhi bhar dunga aur asal paisa bhi."
Raghav ne Suman ki taraf dekha.
Suman ki aankhon me halka sa darr tha.
"Mat karo ji… aaj kal ka zamana theek nahi," Suman ne dheere se kaha.
Lekin Raghav ka dil bhai ke liye pighal gaya.
"Vikram kabhi galat nahi karega," usne khud se kaha.
Aur usne shehar ke mashhoor sahukaar Mahesh Seth se paise byaj par dilwa diye.
Aur phir…
Ek hafte baad Vikram gayab ho gaya.
Phone band.
Pata band.
Shehar chhod kar bhaag gaya.
Shuru ke kuch din Raghav ne sabko samjhaya —
"Woh aa jayega… mera bhai hai."
Lekin teen mahine baad jab sach saamne aaya…
Mahesh Seth aur uske aadmi seedha Raghav ki tapri par aa pahuche.
"Paise de!" Seth garja.
"Tune guarantee li thi!"
Raghav haath jod kar bola,
"Woh mera bhai tha… main kaise janta ki woh bhaag jayega?"
Jawab me use sirf thappad mile.
Us din puri bazaar ke saamne Raghav ko maara gaya.
Uski izzat mitti me mila di gayi.
Karz ka bojh
Raghav ne kasam khai —
"Main karz chukaunga… chahe jaan chali jaye."
Din me chai ki tapri…
Raat me godown me mazdoori.
Do saal beet gaye.
Phir bhi karz kam nahi hua… kyunki byaj badhta hi ja raha tha.
Majboori me Suman bhi ek company me kaam karne lagi.
Lekin ghar ki halat aur kharab ho gayi.
Bachchon ki school fees nahi bhari ja saki.
Aarav aur Meera ko exam dene nahi diya gaya.
Kabir ro raha tha — "Papa, main school kyun nahi ja sakta?"
Raghav ke paas koi jawab nahi tha.
Aur phir…
Pareshaniyon ne Raghav ko tod diya.
Ab woh har baat par Suman par shaq karne laga.
"Tu roz der se kyun aati hai?"
"Company me sach me kaam karti hai na?"
Suman chup rehti…
Uski aankhon me sirf aansu hote.
Ek raat ghar me bhayankar jhagda hua.
Bachche dare hue kone me khade the.
Suman cheekh kar boli,
"Main tumhare liye kaam kar rahi hoon! Tumhari izzat bachane ke liye!"
Raghav ne gusse me haath utha diya…
Lekin uska haath hawa me hi ruk gaya.
Usi waqt darwaze par zor ki dastak hui.
Raghav ne darwaza khola…
Bahaar Mahesh Seth khada tha.
Lekin is baar woh akela nahi tha.
Uske saath ek aadmi khada tha…
Jise dekhte hi Raghav ki aankhen phat gayi.
Woh Vikram tha.
Lekin Vikram ke chehre par darr nahi…
Balki ajeeb si muskaan thi.
Aur Mahesh Seth ne dheere se kaha —
"Raghav… tujhe pata bhi hai asli sach kya hai?"
Raghav ka dil zor se dhadakne laga.
Kya Vikram wapas paise dene aaya tha…
ya koi aur bada raaz chhupa tha?
👉 To be continued…