Ladka ka naam Abhishek tha aur uska sabse achha dost Rohit tha. Dono bachpan se saath the. School ki pehli bench se lekar khel ke maidan tak, har jagah unki dosti chamakti thi. Log kehte the, "Agar dosti dekhni ho, to Abhishek aur Rohit ko dekho." Abhishek aur Rohit dono Vaishali ke rehne wale the, aur unki dosti unke shehar ki pehchaan ban chuki thi.
Zindagi bilkul seedhi chal rahi thi, tabhi ek din Abhishek ki life mein ek nayi kahani shuru hui. Uska naam tha Ayushi. Wo bahut pyaari, seedhi aur padhai mein bahut tez thi. Ayushi ka ghar Chapra mein tha, lekin wo apne mummy-papa ke saath Muzaffarpur mein rehti thi. Wahi school mein padhati thi jahan Abhishek padhta tha.
Jab Abhishek ne pehli baar Ayushi ko dekha, us pal jaise waqt ruk sa gaya. Uski muskaan ne Abhishek ke dil mein ek nayi feeling jagaa di. Dheere-dheere Abhishek ko samajh aaya ki wo sirf pasand nahi, balki use dil se chahne laga hai.
Ek din usne apne sabse kareebi dost Rohit se kaha,
"Yaar, wo ladki mujhe bahut zyada pasand hai."
Rohit ne hans kar uske kandhe par haath rakha aur bola,
"Phir der kis baat ki? Agar dil sachcha hai to baat karne ki himmat bhi rakh."
Rohit ke hausle ne Abhishek ko himmat di. Dheere-dheere Abhishek aur Ayushi ki baatein shuru hui. Pehle padhai ke bahane, phir hasi-mazaak, aur phir ek pyari si dosti. Abhishek khush rehne laga. Har din use school jaane ka intezar rehta.
Lekin kahte hain na, jab zindagi mein kuch naya aata hai, to purani cheezein thodi nazarandaz ho jaati hain. Rohit ko mehsoos hone laga ki Abhishek ab uske saath pehle jaisa waqt nahi bitata. Jahan pehle dono saath baithte the, ab Abhishek aksar Ayushi se baat karta dikhai deta. Rohit chup raha, lekin uske dil mein halka sa dard tha.
Ek din Rohit ne himmat karke Abhishek se kaha,
"Dost, ladkiyan zindagi mein aati-jaati rehti hain, par asli dosti zindagi bhar saath deti hai."
Yeh shabd seedhe Abhishek ke dil tak pahunch gaye. Usne pehli baar mehsoos kiya ki pyaar ke chakkar mein wo apne sabse gehre rishte ko kamzor kar raha tha. Usne turant Rohit se maafi maangi aur kaha,
"Tu hi mera asli dost hai. Tere bina meri zindagi adhuri hai."
Rohit muskuraya. Usne kaha,
"Bas yaad rakh, dosti kabhi kam nahi honi chahiye."
Samay ke saath sab theek ho gaya. Abhishek ne seekha ki pyaar aur dosti dono zaroori hote hain, lekin unhe balance karna sabse bada hunar hai. Rohit ne bhi samjha ki sachchi dosti mein thoda samajh aur thoda sabr zaroori hota hai.