Maahi — Kirdar ka Ta'aruf
Maahi 17 saal ki ek ba-waqar aur suljhi hui larki thi.
Umar me chhoti hone ke bawajood, soch aur guftagu me ghair-mamooli pakhgi rakhti thi.
Safai uski aadat nahi, balkay uski pehchan thi.
Har cheez qareene se rakhna,
har kaam saliqe se karna,
aur har baat me nafasat—
ye sab Maahi ki fitrat ka hissa tha.
Use khana banana behad pasand tha,
khaas taur par Italian khanay.
Kitchen me wo sirf khana nahi banati thi,
balke apni mohabbat bhi mila deti thi.
Taleem ke maamlay me bhi Maahi hamesha aage rahi.
Islami taleem se gehra lagao,
deen ko samajhne wali,
aur duniyaavi taleem me bhi aage barhne ka khwab rakhne wali.
Uska irada tha ke aage ja kar Masters kare
aur apni pehchan apne ilm se banaye.
Ghar me Maahi ka maqam sab se khaas tha.
Do bhaiyon aur ek behn ke darmiyan
wo sab se laadli thi.
Walidain ki aankhon ka noor,
aur poore khandaan me sab ki favourite.
Aur uski aankhein…
aisi aankhein jo seedha dil tak utar jaati thin.
Gehri, pur-asar,
ke jo ek dafa dekh leta,
bas dekhta hi reh jaata.
Uski baat cheet me itni mithaas aur tehzeeb thi
ke jo bhi use dekhta ya suntا,
dil hi dil me ye khwahish karta:
"Kaash ye mere ghar ki bahu banay…"
🌿 Mustaqeem — Kirdar ka Ta'aruf
Mustaqeem Aligarh Muslim University se parha hua tha—
jo Hindustan ki mashhoor aur mo'tabar universities me se ek hai.
Wo sirf padha likha nahi,
balke har fun me maahir tha.
Har topic par baat kar sakta tha,
aur samne wale ko lajawab kar dena jaanta tha.
Shakhsiyat me khud-aitemaad,
lehje me sanjeedgi,
lekin mizaj me thori sakhti.
Gussa bhi tha uski fitrat ka hissa,
magar us gusse ke peeche
ek gehri mohabbat chhupi hui thi.
Kabhi kabhi khud-gharz sa bhi lagta,
shayad is liye ke use bachpan se
sirf apne bharosay jeena para.
Bachpan se hostel ki zindagi ne
use waqt se pehle bada kar diya tha.
Ghar kam aata tha,
walidain se zyada tar door hi raha.
Isi doori ne use mazboot bhi banaya
aur tanha bhi.
Wo mohabbat karna jaanta tha,
magar jataana nahi.
Aur yehi baat
aane wale dino me
Maahi aur Mustaqeem ke darmiyan
narazgiyon ki wajah banne wali thi.
🌸 Qismat ka Pehla Mor
Hairat ki baat ye thi ke
Maahi aur Mustaqeem
aaj tak na kabhi ek dosray ko dekha tha
aur na hi kabhi mile thay.
Fasana—
jo Maahi ke walid ke mama zaad larkay ki biwi thi,
aur Maahi ki door ki rishtedaar bhi—
un dono ke darmiyan ek anjaana sa raabta banne wali thi.
Rishtay hone ke bawajood
unki mulaqat kabhi nahi hui thi.
Aur phir…
shadi aayi.
Jo ke maahi ke chote chacha ki shaadi ti
📖 Shadi ka Manzar
Shadi ka ghar roshniyon se bharpoor tha.
Har taraf hansi, baatein aur qehqahay bikhre hue thay.
Magar Maahi—
in sab se thori alag—
auraton ke hisse me
khamoshi se baithi hui thi.
Wo black colour ki saari me malboos thi.
Uski saadgi uske chehray se jhalak rahi thi.
Na wo khud ko numayan karna chahti thi,
na kisi ki tawajjo ki talabgar thi—
phir bhi nazar khud-ba-khud
usi par ja kar thehar jaati thi.
Isi lamhe Fasana ki nazar us par pari.
"Ye kaun hai?"
Fasana ne aahista se poocha.
"Maahi… abdul rehman Bhai aur Heena bhabhi ki beti hai ,"
jawab muskurahat ke sath aaya.
Fasana ko pata nahi kyun,
wo naam acha lag gaya.
Wo khud chal kar Maahi ke paas ja baithi.
"Tum kaafi khamosh ho…"
Fasana ne muskurate hue baat shuru ki.
Maahi ne nazrein uthai'n,
aur halki si muskurahat ke sath boli:
"Mujhe shor se zyada khamoshi pasand hai."
Fasana ek pal ke liye chup ho gayi,
phir hans pari.
"Aur mujhe baatein…
shayad is liye hum dono mukhtalif hain."
Maahi ne jawab nahi diya,
bas muskura di.
Shayad
yeh muskurahat
Zindagi ki pheli neev ti syd